Infinix Note 30 5G | 108 എംപി ക്യാമറയുമായി ഇൻഫിനിക്സ് നോട്ട് 30 5ജി സ്മാർട്ട്ഫോൺ ഇന്ത്യയിൽ അവതരിപ്പിച്ചു

ഇൻഫിനിക്‌സ് നോട്ട് 30 5ജി (Infinix Note 30 5G) സ്മാർട്ട്ഫോൺ ഇന്ത്യൻ വിപണിയിൽ അവതരിപ്പിച്ചു. കുറഞ്ഞ വിലയിൽ മികച്ച സവിശേഷതകൾ നൽകുന്ന സ്മാർട്ട്ഫോണാണ് ഇത്. 108 മെഗാപിക്‌സൽ പ്രൈമറി ക്യാമറ, മീഡിയടെക് ഡൈമൻസിറ്റി 6080 എസ്ഒസി, 5,000mAh ബാറ്ററി പായ്ക്ക്, 45W വയേഡ് ചാർജിങ്, ബൈപാസ് ചാർജിംഗ് മോഡ് തുടങ്ങിയ മികച്ച സവിശേഷതകളോടെയാണ് ഈ ഡിവൈസ് വരുന്നത്. ഇൻഫിനിക്‌സ് നോട്ട് 30 5ജി സ്മാർട്ട്ഫോണിന്റെ വിലയും സവിശേഷതകളും വിശദമായി നോക്കാം.

Infinix Note 30 5G | വിലയും ലഭ്യതയും

ഇൻഫിനിക്‌സ് നോട്ട് 30 5ജി സ്മാർട്ട്ഫോണിന്റെ രണ്ട് വേരിയന്റുകളാണ് ഇന്ത്യയിൽ അവതരിപ്പിച്ചിരിക്കുന്നത്. ഫോണിന്റെ 4 ജിബി റാമും 128 ജിബി സ്റ്റോറേജുമുള്ള വേരിയന്റിന് 14,999 രൂപയാണ് വില. 8 ജിബി റാമും 128 ജിബി സ്റ്റോറേജുമുള്ള ഇൻഫിനിക്‌സ് നോട്ട് 30 5ജി സ്മാർട്ട്ഫോണിന് 15,999 രൂപ വിലയുണ്ട്. ഈ ഡിവൈസ് വാങ്ങുമ്പോൾ ആക്‌സിസ് ബാങ്ക് ഡെബിറ്റ്, ക്രെഡിറ്റ് കാർഡുകൾ ഉപയോഗിക്കുന്ന ആളുകൾക്ക് 1,000 രൂപ കിഴിവും ലഭിക്കും. ജൂൺ 22 മുതൽ ഫ്ലിപ്പ്കാർട്ടിലൂടെ സ്മാർട്ട്ഫോൺ വിൽപ്പനയ്ക്കെത്തും.

ഡിസ്പ്ലെയും പ്രോസസറും

ഇൻഫിനിക്‌സ് നോട്ട് 30 5ജി സ്മാർട്ട്ഫോണിൽ 6.78-ഇഞ്ച് ഫുൾ-എച്ച്ഡി+ ഐപിഎസ് ഡിസ്‌പ്ലേയാണുള്ളത്. ഈ ഡിസ്പ്ലെയ്ക്ക് 120Hz റിഫ്രഷ് റേറ്റ്, 240Hz ടച്ച് സാമ്പിൾ റേറ്റ്, 580 നിറ്റ്സ് വരെ പീക്ക് ബ്രൈറ്റ്നസ് എന്നീ സവിശേഷതകളുണ്ട്. ഒക്ടാ-കോർ മീഡിയടെക്ക് ഡൈമൻസിറ്റി 6080 പ്രോസറിന്റെ കരുത്തിലാണ് ഇൻഫിനിക്‌സ് നോട്ട് 30 5ജി പ്രവർത്തിക്കുന്നത്. മാലി G57 MC2 ജിപിവുമായി വരുന്ന ഈ ഫോണിൽ 8 ജിബി വരെ റാമും ഉണ്ട്. ആൻഡ്രോയിഡ് 13 ബേസ്ഡ് എക്സ്ഒഎസ് 13 ഔട്ട്-ഓഫ്-ബോക്‌സിലാണ് ഫോൺ പ്രവർത്തിക്കുന്നത്.

ക്യാമറകൾ

മൂന്ന് പിൻ ക്യാമറകളുമായിട്ടാണ് ഇൻഫിനിക്‌സ് നോട്ട് 30 5ജി സ്മാർട്ട്ഫോൺ വരുന്നത്. 108 മെഗാപിക്സൽ പ്രൈമറി ക്യാമറയ്ക്കൊപ്പം സെക്കൻഡറി, ടെർഷ്യറി സെൻസറുകളും നൽകിയിട്ടുണ്ട്. സെൽഫികൾക്കും വീഡിയോ കോളുകൾക്കുമായി 16 മെഗാപിക്സൽ സെൽഫി ക്യാമറയാണ് ഈ ഡിവൈസിൽ ഇൻഫിനിക്‌സ് നൽകിയിട്ടുള്ളത്. ഇൻഫിനിക്‌സ് നോട്ട് 30 5ജിയിൽ ജെബിഎൽ ഓഡിയോയും ഹൈ-റെസലൂഷൻ ഓഡിയോ സർട്ടിഫിക്കേഷനും ഉള്ള ഡ്യുവൽ സ്റ്റീരിയോ സ്പീക്കറുകളുമുണ്ട്.

സ്റ്റോറേജും കണക്റ്റിവിറ്റിയും

ഇൻഫിനിക്‌സ് നോട്ട് 30 5ജി സ്മാർട്ട്ഫോണിൽ 256 ജിബി വരെ സ്റ്റോറേജാണുള്ളത്. ഈ സ്റ്റോറേജ് തികയാത്തവർ്ക് മൈക്രോ എസ്ഡി കാർഡ് സ്ലോട്ട് വഴി സ്റ്റോറേജ് എക്സ്പാൻഡ് ചെയ്യാനും സാധിക്കും. 5ജി, 4ജി, വൈഫൈ, ബ്ലൂടൂത്ത്, ജിപിഎസ്, എൻഎഫ്സി, 3.5mm ഓഡിയോ ജാക്ക്, യുഎസ്ബി ടൈപ്പ്-സി പോർട്ട് എന്നീ കണക്റ്റിവിറ്റി ഓപ്ഷനുകളും ഇൻഫിനിക്‌സ് നോട്ട് 30 5ജിയിൽ ഉണ്ട്. ആംബിയന്റ് ലൈറ്റ് സെൻസർ, ഇ-കോമ്പസ്, ഗൈറോസ്കോപ്പ്, ലൈറ്റ് സെൻസർ, പ്രോക്സിമിറ്റി സെൻസർ എന്നിവയാണ് ഫോണിലെ സെൻസറുകൾ.

ബാറ്ററിയും ചാർജിങ് സപ്പോർട്ടും

ഫിംഗർപ്രിന്റ് സെൻസറുമായിട്ടാണ് ഇൻഫിനിക്‌സ് നോട്ട് 30 5ജി വരുന്നത്. ഈ സ്മാർട്ട്ഫോണിൽ 45W ഫാസ്റ്റ് ചാർജിങ് സപ്പോർട്ടുള്ള 5,000mAh ബാറ്ററിയാണുള്ളത്. ഗെയിമർമാർക്കായി ബൈപാസ് ചാർജിംഗ് ഫീച്ചറും കമ്പനി നൽകിയിട്ടുണ്ട്. ഇതിലൂടെ ബാറ്ററിയുടെ ആരോഗ്യം സംരക്ഷിക്കാനും മദർബോർഡ് നേരിട്ട് പവർ ചെയ്യുന്നതിലൂടെ ചൂട് കുറയ്ക്കാനും സാധിക്കുമെന്ന് കമ്പനി അവകാശപ്പെടുന്നു. 204.7 ഗ്രാം ഭാരമാണ് ഈ സ്മാർട്ട്ഫോണിനുള്ളത്.