Meta Threads | ട്വിറ്ററിനെ വെട്ടാൻ പുതിയ അടവ്; ഇൻസ്റ്റഗ്രാം ത്രെഡ്സിൽ ഇനി കൂടുതൽ ഫീച്ചറുകൾ 2023

ട്വിറ്ററിന് എതിരാളിയായി മെറ്റ പുറത്തിറക്കിയ ത്രെഡ്സിൽ (Meta Threads) പുതിയ ഫീച്ചറുകൾ കൊണ്ടുവരാൻ ഒരുങ്ങുകയാണ് കമ്പനി. ലോഞ്ച് ചെയ്ത ഉടനെ തന്നെ ദശലക്ഷക്കണക്കിന് ഉപയോക്താക്കളെ നേടിയ പ്ലാറ്റ്ഫോം ഇപ്പോൾ ആക്ടീവ് യൂസേഴ്സിന്റെ കാര്യത്തിൽ പിന്നോട്ട് പോവുകയാണ്. ആവേശത്തിൽ പ്ലാറ്റ്ഫോമിലേക്ക് കയറി വന്നവരിൽ മിക്കവരും ത്രെഡ്സ് കാര്യമായി ഉപയോഗിക്കുന്നില്ല എന്നതാണ് ശ്രദ്ധേയമായ കാര്യം. അതുകൊണ്ട് തന്നെ പ്ലാറ്റ്ഫോമിനെ പുതിയ സവിശേഷതകളിലൂടെ കൂടുതൽ ആകർഷകമാക്കാനാണ് മെറ്റ ശ്രമിക്കുന്നത്.

രണ്ട് പുതിയ സവിശേഷതകളാണ് ത്രെഡ്സിൽ മെറ്റ കൊണ്ടുവരുന്നത്. ഫീഡിനും ട്രാൻസലേഷനുമുള്ള ഓപ്ഷനാണ് പ്ലാറ്റ്ഫോമിൽ ലഭ്യമാകുന്നത്. ഈ പ്രധാന സവിശേഷതകൾക്കൊപ്പം, യൂസർ എക്സ്പീരിയൻസ് മെച്ചപ്പെടുത്താനായി അധിക അപ്‌ഡേറ്റുകളും കമ്പനി പുറത്തിറക്കുന്നു. നിങ്ങൾ ഫോളോ ചെയ്യുന്ന ആളുകളുടെ മാത്രം ക്രോണോളജിക്കൽ ഫീഡ് ലഭിക്കാനുള്ള ഓപ്ഷൻ ത്രെഡ്സ് ഇതിനകം തന്നെ ലഭ്യമാക്കി തുടങ്ങിയിട്ടുണ്ട് എന്നാണ് റിപ്പോർട്ടുകൾ നൽകുന്ന സൂചനകൾ.

Meta Threads | കൂടുതൽ സൌകര്യപ്രദമായ ഫീച്ചറുകൾ

ട്രാൻസലേഷൻ ഫീച്ചറാണ് ത്രെഡ്സിലെ രണ്ടാമത്തെ പുതിയ ഫീച്ചർ. പ്ലാറ്റ്ഫോമിൽ വച്ച് തന്നെ എളുപ്പത്തിൽ ടെക്സ്റ്റ് ട്രാൻസലേറ്റ് ചെയ്യാൻ സഹായിക്കുന്ന ഫീച്ചറാണ് ഇത്. ഇനി മുതൽ ത്രെഡ്സ് ഉപയോഗിക്കുന്നവർക്ക് തങ്ങളുടെ ഫീഡിൽ രണ്ട് ഓപ്ഷനുകളിൽ പോസ്റ്റുകൾ കാണാൻ സാധിക്കും. ഇതിൽ ആദ്യത്തേത് അവർ ഫോളോ ചെയ്യുന്ന ആളുകളിൽ നിന്നുള്ള പോസ്റ്റുകൾ ആയിരിക്കും. രണ്ടാമത്തേത് ഫോളെ ചെയ്യാത്തതും എന്നാൽ നിങ്ങൾക്ക് താല്പര്യമുള്ളതുമായ പോസ്റ്റുകളായിരിക്കും.

ഫീഡിൽ രണ്ട് ഓപ്ഷനുകൾ

ഫോർ യു എന്ന വിഭാഗത്തിൽ വരുന്ന ഫീഡിലൂടെ ഫോളോ ചെയ്യാത്ത പോസ്റ്റുകളുടെ നിര തന്നെ കാണാം. ഇത്തരം പോസ്റ്റുകൾ കാണാൻ താല്പര്യമില്ലാത്ത ആളുകൾക്ക് ഫോളോ ചെയ്യുന്ന പ്രൊഫൈലുകൾ മാത്രം തിരഞ്ഞെടുക്കാനുള്ള ഓപ്ഷനും കമ്പനി പുതുതായി നൽകുന്നു. ഉപയോക്താക്കൾ ‘ഫോളോവിങ്’ എന്ന ഓപ്ഷൻ തിരഞ്ഞെടുക്കുകയാണെങ്കിൽ നിങ്ങൾ ഫോളോ ചെയ്യുന്ന ആളുകളുടെ പോസ്റ്റുകൾ മാത്രം ത്രെഡ്സ് ഫീഡിൽ വന്ന് നിറയും.

ട്രാൻസലേഷൻ

പ്ലാറ്റ്ഫോമിൽ തന്നെ ട്രാൻസലേഷൻ സംവിധാനം കൊണ്ടുവന്നതിലൂടെ ത്രെഡ്സ് പോസ്റ്റുകൾ ഏത് ഭാഷയിലായാലും അവ നമുക്ക് അറിയാവുന്ന ഭാഷയിൽ ട്രാൻസലേറ്റ് ചെയ്ത് കാണിച്ച് തരും. നിലവിൽ ഫേസ്ബുക്കിലും മറ്റും ഇത്തരം ട്രാൻസലേഷൻ ഫീച്ചർ ലഭ്യമാണ്. ഫീഡിലെ ത്രെഡ് പോസ്റ്റുകൾ അവ എഴുതിയ ഭാഷയെയും അത് കാണുന്ന വ്യക്തിയുടെ ഭാഷാ സെറ്റിങ്സിനെയും അടിസ്ഥാനമാക്കിയാണ് ഓട്ടോമാറ്റിക്കായി ട്രാൻസലേറ്റ് ചെയ്യപ്പെടുന്നത്. ഇത്തരത്തിൽ ട്രാൻസലേഷൻ ലഭിക്കാനായി പോസ്റ്റിന് താഴെ വലത് വശത്തുള്ള ട്രാൻസലേഷൻ ബട്ടണിൽ ടാപ്പ് ചെയ്യാം.

മറ്റ് ഫീച്ചറുകൾ

മെറ്റയുടെ മേധാവി മാർക്ക് സക്കർബർഗ് ത്രെഡ്സിലെ പുതിയ അപ്‌ഡേറ്റുകൾ പ്രഖ്യാപിച്ചതിന് തൊട്ടുപിന്നാലെ ഇൻസ്റ്റഗ്രാമിന്റെ ചുമതലയുള്ള ആദം മൊസേരി മറ്റ് ചില സവിശേഷതകൾ കൂടി ത്രെഡ്സിൽ പ്രഖ്യാപിച്ചിട്ടുണ്ട്. ഉപയോക്താക്കൾക്ക് അവരുടെ ആക്ടീവിറ്റി ഫീഡ് കാണാനായി പുതിയ ഓപ്ഷനുകൾ ലഭിക്കും. ഇതിൽ ഫോളോവിങ്, ക്വട്ടേഷൻസ്, റീപോസ്റ്റുകൾ എന്നിവയെല്ലാം ഫിൽട്ടർ ചെയ്യാൻ കഴിയും. ത്രെഡ്സിന് ഫോളോവേഴ്‌സ് ലിസ്റ്റിൽ ഒരു ‘ഫോളോ’ ബട്ടണും ലഭിക്കും. ഇത് നമ്മളെ ഫോളോ ചെയ്യുന്ന അക്കൌണ്ടുകളെ എളുപ്പം ഫോളോ ചെയ്യാൻ സഹായിക്കുന്നു.

ഫോളോ റിക്വസ്റ്റ്

നിങ്ങളുടെ അക്കൗണ്ട് പ്രൈവറ്റ് ആണെങ്കിൽ പുതിയ ഫോളോവേഴ്‌സിനെ വേഗത്തിൽ ആക്സപ്റ്റ് ചെയ്യാനുള്ള ഫീച്ചറാണ് ത്രെഡ്സിൽ വരുന്ന മൂന്നാമത്തെ സവിശേഷത. ഉപയോക്താക്കൾക്ക് ഒറ്റയടിക്ക് വരുന്ന ഫോളോ റിക്വസ്റ്റുകളെല്ലാം ഒറ്റയടിക്ക് ആക്സപ്റ്റ് ചെയ്യാൻ സാധിക്കുന്ന ഫീച്ചറും ത്രെഡ്സിൽ പുതുതായി അവതരിപ്പിച്ചിട്ടുണ്ട്. യൂസർ എക്സ്പീരിയൻസ് മെച്ചപ്പെടുത്താനുള്ള ഈ ഫീച്ചറുകളിലൂടെ കൂടുതൽ യൂസേഴ്സിനെ പ്ലാറ്റ്ഫോമിൽ ആക്ടീവ് ആയി നിലനിർത്താൻ സാധിക്കുമെന്നാണ് കമ്പനി പ്രതീക്ഷിക്കുന്നത്.