Realme C51 സ്മാർട്ട്ഫോണിന്റെ വിൽപ്പന ആരംഭിച്ചു; വിലയും സവിശേഷതകളും അറിയാം

ജനപ്രിയ സ്മാർട്ട്ഫോൺ നിർമ്മാതാക്കളായ റിയൽമി അടുത്തിടെയാണ് സി സീരീസിൽ പുതിയ സ്മാർട്ട്ഫോൺ രാജ്യത്ത് അവതരിപ്പിച്ചത്. റിയൽമി സി51 (Realme C51) എന്ന ഡിവൈസാണ് കമ്പനി ലോഞ്ച് ചെയ്തത്. ഈ ഫോണിന്റെ ഓപ്പൺ സെയിൽ ആരംഭിച്ചു. എൻട്രിലെവൽ സ്മാർട്ട്ഫോൺ വിപണിയിലേക്കാണ് റിയൽമി ഈ ഡിവൈസ് അവതരിപ്പിച്ചത്. ഇന്ന് ഉച്ചയ്ക്ക് 12 മണിക്കാണ് ഫോണിന്റെ സെയിൽ ആരംഭിച്ചത്. കുറഞ്ഞ വിലയിൽ ആകർഷമായ സവിശേഷതകളുമായി വരുന്ന ഫോണാണ് ഇത്.

Realme C51 | റിയൽമി സി51

റിയൽമി സി51 സ്മാർട്ട്ഫോണിൽ 90Hz ഡിസ്‌പ്ലേ, വലിയ ബാറ്ററി, യൂണിസോക്ക് ചിപ്‌സെറ്റ്, ഫാസ്റ്റ് ചാർജിങ് സപ്പോർട്ട് എന്നിങ്ങനെയുള്ള മികച്ച സവിശേഷതകളുണ്ട്. ഐഫോൺ 14 പ്രോ മോഡലുകളിലുള്ള ഡൈനാമിക് ഐലൻഡിനെപോലുള്ള റിയൽമിയുടെ മിനി ക്യാപ്‌സ്യൂൾ ഫീച്ചറും ഈ ഫോണിൽ കമ്പനി നൽകിയിട്ടുണ്ട്. ഓപ്പൺ സെയിലിലൂടെ ഫോൺ വാങ്ങുന്നവർക്കായി ആകർഷഖമായ ഓഫറുകളാണ് ഫ്ലിപ്പ്കാർട്ടും റിയൽമിയും നൽകുന്നത്. ഫോണിന്റെ വിലയും ഓഫറുകളും സവിശേഷതകളും നോക്കാം.

വിലയും ഓഫറുകളും

റിയൽമി സി51യുടെ ഒരു വേരിയന്റ് മാത്രമാണ് രാജ്യത്ത് ലഭ്യമായിരിക്കുന്നത്. 4 ജിബി റാമും 64 ജിബി സ്റ്റോറേജുമുള്ള ഈ ഡിവൈസിന് 8,999 രൂപയാണ് വില. മിന്റ് ഗ്രീൻ, കാർബൺ ബ്ലാക്ക് കളർ ഓപ്ഷനുകളിൽ ഫോൺ ലഭ്യമാകും. ഫ്ലിപ്പ്കാർട്ട്, റിയൽമി വെബ്സൈറ്റ് എന്നിവ വഴിയാണ് ഫോണിന്റെ വിൽപ്പന നടക്കുന്നത്. എച്ച്ഡിഎഫ്സി, എസ്ബിഐ, ഐസിഐസിഐ ആക്സിസ്, കൊട്ടക് മഹീന്ദ്ര ബാങ്ക് കാർഡുകൾ ഉപയോഗിച്ച് റിയൽമി സി51 വാങ്ങുന്ന ആളുകൾക്ക് 500 രൂപ കിഴിവ് ലഭിക്കും. ഇതോടെ ഫോണിന്റെ വില 8,499 രൂപയായി കുറയുന്നു.

സവിശേഷതകൾ

റിയൽമി സി51 സ്മാർട്ട്ഫോണിൽ 6.7 ഇഞ്ച് എച്ച്ഡി+ ഐപിഎസ് എൽസിഡി ഡിസ്പ്ലെയാണ് നൽകിയിട്ടുള്ളത്. ഈ ഡിസ്പ്ലെയ്ക്ക് 90Hz റിഫ്രഷ് റേറ്റും 180Hz ടച്ച് സാമ്പിൾ റേറ്റുമുണ്ട്. മിനി ക്യാപ്സ്യൂൾ ഫീച്ചറാണ് ഈ ഡിസ്പ്ലെയുടെ പ്രത്യേകത. ഈ മിനി ക്യാപ്സ്യൂളിൽ ബാറ്ററി, ഡാറ്റ ഉപയോഗം എന്നിങ്ങനെയുള്ള നിരവധി കാര്യങ്ങൾ കാണിക്കാൻ സാധിക്കും. യൂണിസോക്ക് ടി612 എസ്ഒസിയുടെ കരുത്തിലാണ് റിയൽമി സി51 സ്മാർട്ട്ഫോൺ പ്രവർത്തിക്കുന്നത്.

ക്യാമറകൾ

രണ്ട് പിൻക്യാമറകളുമായിട്ടാണ് റിയൽമി സി51 സ്മാർട്ട്ഫോൺ വരുന്നത്. ഈ പിൻ ക്യാമറ സെറ്റപ്പിലെ പ്രൈമറി ക്യാമറ 50 എംപിയാണ്. സെൽഫികൾക്കും വീഡിയോ കോളുകൾക്കുമായി 8 എംപി സെൽഫി ക്യാമറയും ഈ ഡിവൈസിൽ കമ്പനി നൽകിയിട്ടുണ്ട്. സൈഡ് മൗണ്ടഡ് ഫിംഗർപ്രിന്റ് റീഡറും ഹെഡ്‌ഫോൺ ജാക്കുമാണ് ഫോണിലെ മറ്റ് സവിശേഷതകൾ. ഫോണിലെ കണക്റ്റിവിറ്റി ഓപ്ഷനുകളിൽ 4ജി എൽടിഇ, ബ്ലൂടൂത്ത്, വൈഫൈ, യുഎസ്ബി ടൈപ്പ് സി പോർട്ട്, ജിപിഎസ് എന്നിവയെല്ലാം ഉൾപ്പെടുന്നു.

റാമും സ്റ്റോറേജും

4 ജിബി റാമും 64 ജിബി സ്റ്റോറേജുമായി വരുന്ന റിയൽമി സി51 സ്മാർട്ട്ഫോണിൽ സ്റ്റോറേജ് 2 ടിബി വരെ എക്സ്പാൻഡ് ചെയ്യാനുള്ള ഓപ്ഷനും കമ്പനി നൽകിയിട്ടുള്ളത്. ഉപയോഗിക്കാത്ത സ്റ്റോറേജ് 4 ജിബി വരെ റാമാക്കി മാറ്റാനുള്ള വെർച്വൽ റാം സപ്പോർട്ടുമുണ്ട്. ഇതോടെ ഫോണിലെ റാം മൊത്തത്തിൽ 8 ജിബിയാകുന്നു. ആൻഡ്രോയിഡ് 14 ബേസ്ഡ് റിയൽമി യുഐ ടി എഡിഷനിലാണ് ഈ ഡിവൈസ് പ്രവർത്തിക്കുന്നത്. 33W SUPERVOOC ഫാസ്റ്റ് ചാർജിങ് സപ്പോർട്ടുമായി വരുന്ന ഫോണിൽ 5,000 mAh ബാറ്ററിയും കമ്പനി നൽകിയിട്ടുണ്ട്.