Realme C3 Review: കിടിലൻ പെർഫോമൻസ്, പക്ഷെ ആവറേജ് ക്യാമറ

സി സീരിസിൽ ഈയടുത്താണ് ചൈനീസ് സ്മാർട്ഫോൺ നിർമ്മാതാക്കളായ റിയൽമി തങ്ങളുടെ എൻട്രി ലെവൽ സ്മാർട്ഫോണായ റിയൽമി C3 അവതരിപ്പിച്ചത്. മുൻപ് ഇറങ്ങിയ റിയൽമി C2 (Realme C3)ഫോണിന്റെ പിൻഗാമിയായി വിപണിയിലെത്തിയ ഫോണിൽ ഡ്യൂവൽ റിയർ ക്യാമറയും മീഡിയടേക് ഹീലിയോ G70 പ്രോസസറുമാണ് റിയൽമി നൽകിയിരിക്കുന്നത്. C3-യുടെ 3 ജിബി റാം + 32 ജിബി ഇൻബിൽഡ് സ്റ്റോറേജ് മോഡലിന് ഇന്ത്യയിൽ 6,999 രൂപയാണ് വില. അതിലും ഉയർന്ന 4 ജിബി റാം + 64 ജിബി ഇൻബിൽഡ്‌ സ്റ്റോറേജ് മോഡലിന് 7,999 രൂപയാണ് വിലയിട്ടിരിക്കുന്നത്. ഈ ഹാൻഡ്‌സെറ്റിന്റെ 4 ജിബി റാം പതിപ്പാണ് സമയം മലയാളം റിവ്യൂ ചെയ്യുന്നത്.

Realme C3: ഡിസൈൻ

ഡയമണ്ട്-ബാക്ക് ഡിസൈൻ ആണ് ഫോണിന്റേത്. സൺറൈസ് ഡിസൈൻ എന്നാണ് പുതിയ ഡിസൈനിന് റിയൽമി നൽകിയിരിക്കുന്ന പേര്. ഫിംഗർപ്രിന്റ്മാർക്കും സ്ക്രാച്ചും പ്രതിരോധിക്കുന്ന പ്ലാസ്റ്റിക് ബോഡി ആണ് ഫോണിന്റേത്. ഫോണിന്റെ മുൻഭാഗത്തുള്ള വാട്ടർഡ്രോപ്പ് സ്റ്റൈലിലുള്ള നൊച്ചിലാണ് 5 എംപി സെൽഫി ക്യാമറ ക്രമീകരിച്ചിരിക്കുന്നത്. ഇടത് ഭാഗത്താണ് വോളിയം റോക്കേഴ്സ് നൽകിയിരിക്കുന്നത്. പവർ ബട്ടൺ വലതു വശത്താണുള്ളത്. താഴെയായി USB ചാർജിങ് പോർട്ട്, 3.5mm ഹെഡ്‍ഫോൺ ജാക്ക്, സ്പീക്കർ ഗ്രില്ലുകൾ എന്നിവ ക്രമീകരിച്ചിരിക്കുന്നു. മൈക്രോഫോണും താഴെയാണ് നൽകിയിരിക്കുന്നത്.

പിൻഭാഗത്താണ് ഡ്യൂവൽ ലെൻസ് ക്യാമറ നൽകിയിരിക്കുന്നത്. ക്യാമറ മോഡ്യൂളിന് അകത്തായാണ് LED സെൻസർ. ഫിംഗർപ്രിന്റ് സെൻസർ റിയൽമി C3 ഫോണിലില്ല. മികച്ച ഡിസൈനാണ് ഫോണിലേത്.

റിയൽമി C3: ഡിസ്പ്ലേ

6.5-ഇഞ്ചുള്ള HD+ മിനി ഡ്രോപ്പ് ഫുൾസ്ക്രീൻ ഡിസ്‌പ്ലേ ആണ് ഫോണിന്റേത്. 720×1600 ആണ് പിക്സൽ റസല്യൂഷൻ. സ്ക്രീൻ ടു ബോഡി അനുപാതം 89.8% വരും. സിനിമകൾ കാണാനും വീഡിയോകൾ സ്ട്രീം ചെയ്യാനും അനുയോജ്യമായ ഡിസ്‌പ്ലേ ആണിത്. ലൈറ്റ് വെയിറ്റ് ആയതുകൊണ്ടുതന്നെ ഒരു കൈയിൽ സുഗമമായി ഉപയോഗിക്കാനാവും.

ഇൻഡോറിലും ഔട്ഡോറിലും നല്ല ബ്രൈറ്റ്നെസ്സ് ആണ് റിയൽമി C3 നൽകുന്നത്. ഓട്ടോമാറ്റിക്ക് ബ്രൈറ്റ്നെസ്സ് മികച്ച രീതിയിൽ പ്രവർത്തിക്കുന്നുണ്ട്. ഡെഡിക്കേറ്റഡ് ഡാർക്ക് മോഡും ഫോണിലുണ്ട്. സിസ്റ്റം വൈഡ് ഡാർക്ക് മോഡ് ഷെഡ്യൂൾ ചെയ്ത് ഉപയോഗിക്കാനും കഴിയും. സ്ക്രീൻ ഉപയോഗിച്ചും ഫോൺ അൺലോക്ക് ചെയ്യാൻ കഴിയും. മികച്ച അൺലോക്കിങ് സ്പീഡ് ആണ് ഫോണിനുള്ളത്.

Realme C3: പെർഫോമൻസ്

ആൻഡ്രോയിഡ് 10 ഓപ്പറേറ്റിങ് സിസ്റ്റത്തിൽ പ്രവർത്തിക്കുന്ന റിയൽമി C3 സ്മാർട്ഫോണിന് ഹൈപ്പർഎൻജിൻ ടെക്‌നോളജി ഉപയോഗിച്ച് ശക്തി പകരുന്നത് ഒക്ട-കോർ മീഡിയടേക് ഹീലിയോ G70 പ്രോസസറാണ്. പെട്ടന്ന് ആപ്പുകൾക്കിടയിലൂടെ സ്ക്രോൾ ചെയ്യാനും മൾട്ടി-ടാസ്ക് ചെയ്യാനും കഴിയും. സൈസ് കൂടിയ ആപ്ലിക്കേഷനുകൾ ഒരുമിച്ച് ഉപയോഗിക്കുമ്പോൾ ഹാൻഡ്‌സെറ്റ് ചെറുതായി ചൂടാവുന്നുണ്ട്. ആപ്പുകൾ ലോഡാവാനും കുറഞ്ഞ സമയം മാത്രമേ ആവശ്യമുള്ളൂ.

കൂടിയ ഫ്രെയിം റേറ്റ്, വേഗതയുള്ള റെസ്പോൺസ്, കൂടുതൽ മണിക്കൂർ ഗെയിമിംഗ് എന്നിങ്ങനെ മികച്ച ഗെയിമിംഗ് അനുഭവമാണ് റിയൽമി C3 സ്മാർട്ഫോണിൽ പ്രതീക്ഷിച്ചത്. PUBG പോലെയുള്ള ഗെയിമുകൾ കളിച്ചപ്പോഴെല്ലാം ചെറിയ ചില തടസങ്ങൾ ഉണ്ടായെങ്കിലും നല്ല പെർഫോമൻസ് ആണ് ഫോൺ കാഴ്ച വെച്ചത്.

ബാറ്ററി

കോളുകൾ ചെയ്യുമ്പോഴും ഫോണിൽ തടസങ്ങളൊന്നും തന്നെ നേരിട്ടില്ല. 5000mAh ആണ് ഫോണിലെ ബാറ്ററി. കോൾ ചെയ്യാൻ വേണ്ടി മാത്രമാണ് ഫോൺ ഉപയോഗിക്കുന്നതെങ്കിൽ രണ്ട് ദിവസത്തോളം ബാറ്ററി നീണ്ടുനിൽക്കും. യൂസ് കൂടുംതോറും ബാറ്ററിലൈഫ് കുറയുന്നുണ്ട്. 3-4 മണിക്കൂർ സോഷ്യൽ മീഡിയ & ഡാറ്റ ഉപയോഗം, 2-3 മണിക്കൂർ കോളിംഗ്, 1-2 മണിക്കൂർ മ്യൂസിക് എന്നീ ഉപയോഗങ്ങളാണ് ഉള്ളതെങ്കിൽ ഒരു ദിവസം മുഴുവൻ ബാറ്ററി നീണ്ടു നിൽക്കും.

റിയൽമി C3: ക്യാമറ

റിയൽമി C2 ഫോണിൽ നിന്നും C3 യിലേക്ക് എത്തുമ്പോൾ പ്രധാന മാറ്റം ക്യാമറയിലാണ്. ഡ്യൂവൽ റിയർ ക്യാമറ സംവിധാനമാണ് ഫോണിലുള്ളത്. f/1.8 അപേർച്ചറുള്ള 12 എംപിയുടെ പ്രധാന ക്യാമറ, f/2.4 അപേർച്ചറുള്ള 2 എംപി പോർട്രൈറ്റ് ക്യാമറ എന്നിവയാണ് ഈ ക്യാമറ സംവിധാനത്തിലുള്ളത്. പകൽ വെളിച്ചത്തിലും നന്നായി പ്രവർത്തിക്കുന്ന ഈ സെൻസർ ദൂരെയുള്ള ഒബ്ജെക്ടിനെ വരെ വളരെ വേഗത്തിൽ ഫോക്കസ് ചെയ്യുന്നുണ്ട്. പക്ഷെ സബ്ജെക്ട് അടുത്താവുമ്പോൾ ഫോക്കസ് ചെയ്യാൻ ക്യാമറ കഷ്ടപ്പെടുന്നതായി കാണാം. ഫോണിന്റെ വില അനുസരിച്ച് നോക്കുമ്പോൾ തൃപ്തി നൽകുന്ന ചിത്രങ്ങളാണ് ഈ ക്യാമറയിൽ എടുക്കാൻ സാധിക്കുന്നത്.

പോർട്രൈറ്റ്, ടൈം-ലാപ്സ്, സ്ലോ-മോ, എക്സ്പെർട്ട്, പനോ മോഡ് തുടങ്ങിയ ഫീച്ചറുകളാണ് ഹാൻഡ്‌സെറ്റിലുള്ളത്. 120FPS സ്പീഡിൽ സ്ലോ-മോശം വിഡിയോകൾ ഷൂട്ട് ചെയ്യാൻ കഴിയും. ലോ-ലൈറ്റ് ഫോട്ടോകൾക്കായി നൈറ്റ്സ്കേപ് മോഡുമുണ്ട്. രാത്രി എടുക്കുന്ന ഷോട്ടുകളിൽ ക്വാളിറ്റി കുറവാണ്.

സെൽഫി ക്യാമറ

സെൽഫികൾക്കായി 5 എംപിയുടെ ഫ്രണ്ട് ക്യാമറയാണ് റിയൽമി C3 സ്മാർട്ഫോണിലുള്ളത്. f/2.4 അപേർച്ചറുള്ള ഈ ക്യാമറയ്ക്ക് CMOS സെൻസറുമുണ്ട്. ടച്ച്. ജസ്റ്റർ, ടൈമർ എന്നിങ്ങനെ മൂന്നു തരത്തിൽ ഫോട്ടോസ് ക്ലിക്ക് ചെയ്യാൻ കഴിയും. ബ്ലർ ഇഫക്ടും സെൽഫികളിൽ നൽകാം. എന്തായാലും റിയൽമി C3 യിലെ സെൽഫി ക്യാമറ നിങ്ങളെ നിരാശരാക്കും. നൈറ്റ് മോഡ് സെൽഫികളും പ്രതീക്ഷ തകർക്കും. മികച്ച ഹാൻഡ്‌സെറ്റാണെങ്കിലും ക്യാമറയുടെ കാര്യത്തിൽ ഉപയോക്താക്കളുടെ പ്രതീക്ഷയ്‌ക്കൊത്ത് ഉയരാത്ത ക്യാമറ സംവിധാനമാണ് റിയൽമി C3 സ്മാർട്ഫോണിലേത്. ഈ വില നിലവാരത്തിലുള്ള മറ്റ് ഹാൻഡ്‌സെറ്റുകൾ ഇതിലും മികച്ച ക്യാമറ ഫീച്ചറുകൾ നൽകുന്നുണ്ട്.

വേർഡിക്ട്

ഡ്യൂവൽ റിയർ ക്യാമറയും ഗെയിമിംഗ് പ്രോസസറുമുള്ള റിയൽമി C3 മുൻപ് ഇറങ്ങിയ റിയൽമി C2 ഫോണിന് ലഭിക്കാവുന്ന ഏറ്റവും മികച്ച അപ്ഗ്രേഡ് ഓപ്‌ഷനാണ്. ക്യാമറ പെർഫോമൻസിൽ ഫോൺ നിരാശപ്പെടുത്തുമെങ്കിലും ഈ പ്രൈസ് സെഗ്മെന്റിൽ ഫോൺ അന്വേഷിക്കുന്നവരെ ആ പ്രശ്നം ബാധിക്കാൻ സാധ്യത കുറവാണ്. മികച്ച ബാറ്ററി ലൈഫ്, നല്ല പ്രൊസസർ, വലിയ സ്ക്രീൻ എന്നീ കാരണങ്ങളെല്ലാം റിയൽമി C3 വാങ്ങിക്കാൻ പ്രേരിപ്പിക്കുന്ന ഘടകങ്ങളാണ്. ഇതിനെല്ലാംപുറമെ ഏറ്റവും പുതിയ ആൻഡ്രോയിഡ് 10 ഓപ്പറേറ്റിങ് സിസ്റ്റം അടിസ്ഥാനമാക്കി പ്രവർത്തിക്കുന്ന, സിസ്റ്റം വൈഡ് ഡാർക്ക് മോഡ് നൽകുന്ന വില കുറഞ്ഞ ഫോണുകളിലൊന്നാണ് ഈ ഹാൻഡ്‌സെറ്റ്.