Redmi | 5,999 രൂപ വിലയിൽ പുത്തൻ റെഡ്മി സ്മാർട്ട്ഫോൺ; റെഡ്മി എ2, എ2+ സ്മാർട്ട്ഫോണുകൾ ഇന്ത്യൻ വിപണിയിലെത്തി

ഷവോമിയുടെ ഉടമസ്ഥതയിലുള്ള സ്മാർട്ട്ഫോൺ ബ്രാന്റായ റെഡ്മി ഇന്ത്യൻ വിപണിയിൽ വില കുറഞ്ഞ രണ്ട് ഫോണുകൾ പുറത്തിറക്കി. റെഡ്മി എ2 (Redmi A2), റെഡ്മി എ2+ (Redmi A2+) എന്നീ ഡിവൈസുകളാണ് കമ്പനി ലോഞ്ച് ചെയ്തിരിക്കുന്നത്. ഒന്നിലധികം കളർ ഓപ്ഷനുകളിൽ ലഭ്യമാകുന്ന ഈ സ്മാർട്ട്ഫോണുകൾ വാട്ടർഡ്രോപ്പ് സ്റ്റൈൽ നോച്ചുമായിട്ടാണ് വരുന്നത്. രണ്ട് ഫോണുകളിലും 5,000mAh ബാറ്ററികളുമുണ്ട്. മീഡിയടെക് ചിപ്പസെറ്റപ്പാണ് ഫോണുകളിലുള്ളത്.

Redmi | റെഡ്മി എ2 സീരീസ് ഫോണുകൾ

റെഡ്മി എ2, റെഡ്മി എ2+ സ്മാർട്ട്ഫോണുകളിൽ 4 ജിബി വരെ റാമും 64 ജിബി വരെ സ്റ്റോറേജുമാണുള്ളത്. 6.52 ഇഞ്ച് എച്ച്‌ഡി+ എൽസിഡി സ്‌ക്രീനുമായി വരുന്ന ഫോണുകളാണ് ഇവ. സവിശേഷതകൾ സമാനമാണ് എങ്കിലും റെഡ്മി എ2+ സ്മാർട്ട്ഫോണിൽ ഫിംഗർപ്രിന്റ് സെൻസർ അധികമായി നൽകിയിട്ടുണ്ട്. ഫോണുകളുടെ വിലയും സവിശേഷതകളും വിശദമായി നോക്കാം.

റെഡ്മി എ2 സ്മാർട്ട്ഫോണിന്റെ 2 ജിബി റാമും 32 ജിബി സ്റ്റോറേജുമുള്ള വേരിയന്റിന് 5,999 രൂപയാണ് വില. ഫോണിന്റെ 2 ജിബി റാമും 64 ജിബി സ്‌റ്റോറേജുമുള്ള വേരിയന്റിന് 6,499 രൂപ വിലയുണ്ട്. ഫോണിന്റെ 4 ജിബി റാമും 64 ജിബി സ്റ്റോറേജുമുള്ള മോഡലിന് ഇന്ത്യയിൽ 7,499 രൂപയാണ് വില. റെഡ്മി എ2+ സ്മാർട്ട്ഫോണിന്റെ 4 ജിബി റാമും 64 ജിബി സ്റ്റോറേജുമുള്ള മോഡലിന് 8,499 രൂപയാണ് വില. പ്ലസ് മോഡൽ ഒരു വേരിയന്റിൽ മാത്രമാണ് അവതരിപ്പിച്ചിരിക്കുന്നത്.

ഓഫറുകൾ

റെഡ്മി എ2, റെഡ്മി എ2+ സ്മാർട്ട്ഫോണുകൾ ബ്ലാക്ക്, ലൈറ്റ് ഗ്രീൻ, ലൈറ്റ് ബ്ലൂ കളറുകളിൽ ലഭ്യമാകും. ഫോണുകളുടെ വിൽപ്പന ആമസോൺ, എംഐ ഡോട്ട് കോം, എംഐ ഹോം സ്റ്റോറുകൾ, ഷവോമിയുടെ റീട്ടെയിൽ പാർട്ട്ണർ ഔട്ട്ലെറ്റുകൾ എന്നിവ വഴിയാണ് നടക്കുന്നത്. മെയ് 23 ന് ഉച്ചയ്ക്ക് 12 മണി മുതൽ ഫോണുകൾ ഇന്ത്യയിൽ വിൽപ്പനയ്ക്കെത്തും. ഐസിഐസിഐ ബാങ്ക് കാർഡുകൾ ഉപയോഗിച്ച് റെഡ്മി എ2 സീരീസ് സ്മാർട്ട്ഫോണുകൾ വാങ്ങുന്ന ഉപഭോക്താക്കൾക്ക് 500 ക്യാഷ്ബാക്ക് ലഭിക്കും. രണ്ട് വർഷത്തെ വാറന്റിയോടെയാണ് ഫോണുകൾ വരുന്നത്.

ഡിസ്പ്ലെയും പ്രോസസറും

റെഡ്മി എ2 സീരീസിലെ രണ്ട് ഫോണുകളിലും 120Hz ടച്ച് സാംപ്ലിങ് റേറ്റുള്ള 6.52-ഇഞ്ച് HD+ (1600 x 720 പിക്‌സൽ) എൽസിഡി ഡിസ്പ്ലെയാണുള്ളത്. സെൽഫി ക്യാമറ സ്ഥാപിക്കാനായി ഡിസ്പ്ലെയിൽ വാട്ടർഡ്രോപ്പ്-സ്റ്റൈൽ നോച്ച് കൊടുത്തിട്ടുണ്ട്. മീഡിയടെക് ഹീലിയോ ജി36 എസ്ഒസിയുടെ കരുത്തിലാണ് ഈ ഫോണുകൾ പ്രവർത്തിക്കുന്നത്. 4 ജിബി വരെ റാമുള്ള ഫോണിൽ വെർച്വൽ റാം ഫീച്ചറിലൂടെ 7 ജിബി വരെ റാം എക്സ്പാൻഡ് ചെയ്യാനും സാധിക്കും.

ക്യാമറകൾ

റെഡ്മി എ2, റെഡ്മി എ2+ ഫോണുകളിൽ 8 മെഗാപിക്‌സൽ പ്രൈമറി സെൻസറും ക്യുവിജിഎ ക്യാമറയും അടങ്ങുന്ന എഐ സപ്പോർട്ടുള്ള ഡ്യുവൽ റിയർ ക്യാമറ സെറ്റപ്പാണുള്ളത്. സെൽഫികൾക്കും വീഡിയോ കോളുകൾക്കുമായി 5 മെഗാപിക്സൽ ക്യാമറ സെൻസറും ഡിവൈസുകളിലുണ്ട്. ഡ്യുവൽ സിം സപ്പോർട്ട് ചെയ്യുന്ന ഈ ഡിവൈസുകൾ ആൻഡ്രോയിഡ് 13 ഒഎസിലാണ് പ്രവർത്തിക്കുന്നത്.

സ്റ്റോറേജും ബാറ്ററിയും

റെഡ്മി എ2 സീരീസിലെ രണ്ട് മോഡലുകളും 64 ജിബി വരെ ഓൺബോർഡ് സ്റ്റോറേജുമായി വരുന്നു. മൈക്രോ എസ്ഡി കാർഡ് സ്ലോട്ട് വഴി സ്റ്റോറേജ് 512 ജിബി വരെ എക്സ്പാൻഡ് ചെയ്യാനും സാധിക്കും. വൈഫൈ, ബ്ലൂടൂത്ത്, എഫ്എം റേഡിയോ, 3.5 എംഎം ഹെഡ്‌ഫോൺ ജാക്ക് എന്നിവയാണ് ഫോണിലെ കണക്റ്റിവിറ്റി ഓപ്ഷനുകൾ. 10W ഫാസ്റ്റ് ചാർജിങ് സപ്പോർട്ടുള്ള ഫോണുകളിൽ 5,000mAh ബാറ്ററികളാണുള്ളത്. ഒറ്റ ചാർജിൽ 32 ദിവസം വരെ സ്റ്റാൻഡ്‌ബൈ ടൈമും 150 മണിക്കൂർ വരെ പ്ലേ ടൈമും നൽകാൻ ഈ ബാറ്ററിക്ക് സാധിക്കുമെന്ന് റെഡ്മി അവകാശപ്പെടുന്നു.