മൂന്ന് കിടിലൻ സ്മാർട്ട്ഫോണുകളുമായി Redmi Note 13 Series വരുന്നു

ജനപ്രിയ സ്മാർട്ട്ഫോൺ ബ്രാന്റായ റെഡ്മി തങ്ങളുടെ നോട്ട് വിഭാഗത്തിൽ പുതിയ സ്മാർട്ട്ഫോൺ സീരീസ് അവതരിപ്പിക്കാനുള്ള ഒരുക്കത്തിലാണ്. ഷവോമിയുടെ സബ് ബ്രാന്റായ റെഡ്മിയുടെ ഏറ്റവും ജനപ്രിയമായ മോഡലാണ് റെഡ്മി നോട്ട് സീരീസ്. റെഡ്മി നോട്ട് 12 സീരീസിന്റെ പിൻഗാമികളായി വരുന്ന റെഡ്മി നോട്ട് 13 സീരീസ് (Redmi Note 13 Series) സ്മാർട്ട്ഫോണുകൾ സെപ്റ്റംബർ 21ന് ലോഞ്ച് ചെയ്യും. ചൈനീസ് വിപണിയിലാണ് ഈ ഡിവൈസുകൾ ആദ്യം അവതരിപ്പിക്കാൻ പോകുന്നത്. ഇന്ത്യൻ വിപണിയിലെ ലോഞ്ചിനെ കുറിച്ചുള്ള സൂചനകളൊന്നും ലഭിച്ചിട്ടില്ല.

Redmi Note 13 Series | റെഡ്മി നോട്ട് 13 സീരീസ്

റെഡ്മി നോട്ട് 13 സീരീസിൽ റെഡ്മി നോട്ട് 13, റെഡ്മി നോട്ട് 13 പ്രോ, റെഡ്മി നോട്ട് 13 പ്രോ+ എന്നീ മൂന്ന് മോഡലുകളായിരിക്കും ഉണ്ടായിരിക്കുക എന്നാണ് റിപ്പോർട്ടുകൾ നൽകുന്ന സൂചനകൾ. ഓഗസ്റ്റിൽ ഇന്ത്യയിൽ അവതരിപ്പിച്ച റെഡ്മി 12 പ്രോ സീരീസിന്റെ പിൻഗാമിയായിട്ടാണ് റെഡ്മി നോട്ട് 13 സീരീസ് വരുന്നത്. മുൻതലമുറ റെഡ്മി നോട്ട് സ്മാർട്ട്ഫോണുകളെ പോലെ കുറഞ്ഞ വിലയും സെഗ്മെന്റിലെ ഏറ്റവും മികച്ച സവിശേഷതകളുമായിട്ടായിരിക്കും റെഡ്മി നോട്ട് 13 സീരീസ് പുറത്തിറങ്ങുന്നത്.

ഡിസൈൻ

റെഡ്മി നോട്ട് സീരീസിലെ ആദ്യത്തെ കർവ് ഡിസ്‌പ്ലേയുള്ള ഫോണായിട്ടായിരിക്കും റെഡ്മി നോട്ട് 13 പ്രോ+ വരുന്നത്. മുൻ തലമുറ മോഡലുകളിൽ നിന്നും വ്യത്യസ്തമായ ഡിസൈനായിരിക്കും പുതിയ ഫോണുകളിൽ ഉണ്ടായിരിക്കുക. ഫോണിന് വലത് അറ്റത്ത് വോളിയം റോക്കറും പവർ ബട്ടണുകളും ഉണ്ടായിരിക്കുമെന്നും ടീസർ ചിത്രങ്ങളിലൂടെ വ്യക്തമാകുന്നു. ഡിസ്പ്ലെയിൽ സെൽഫി ക്യാമറ സ്ഥാപിക്കാനായി മുകളിൽ മധ്യമാഭാഗത്ത് പഞ്ച്-ഹോൾ കട്ട്ഔട്ടും ഉണ്ടായിരിക്കും.

ഡിസ്പ്ലെ

റെഡ്മി നോട്ട് 13 പ്രോ+ സ്മാർട്ട്ഫോണിൽ 120Hz റിഫ്രഷ് റേറ്റുള്ള 6.67 ഇഞ്ച് 1.5K അമോലെഡ് ഡിസ്‌പ്ലേയാണുള്ളത്. ഈ ഡിസ്‌പ്ലേയ്ക്ക് ചുറ്റും വളരെ നേർത്ത ബെസലുകളും ഉണ്ടായിരിക്കും. 2.37 എംഎം മാത്രമുള്ള ചിന്നുമായി വരുന് ഫോണിൽ സുരക്ഷയ്ക്കായി കോർണിങ് ഗൊറില്ല ഗ്ലാസ് വിക്ടസ് ഗ്ലാസ് പ്രൊട്ടക്ഷനായിരിക്കും ഉണ്ടായിരിക്കുക. എഫ്/1.65 അപ്പർച്ചർ, ഒപ്റ്റിക്കൽ ഇമേജ് സ്റ്റെബിലൈസേഷൻ എന്നിവയുള്ള 200 എംപി സാംസങ് ISOCELL HP3 സെൻസറും ഈ സ്മാർട്ട്ഫോണിൽ ഉണ്ടായിരിക്കും.

ചിപ്പ്സെറ്റ്

റെഡ്മി നോട്ട് 13 സീരീസിൽ വ്യത്യസ്തമായ ഡിസൈൻ ഘടകങ്ങൾ ഉണ്ടാകുമെന്നാണ് പ്രതീക്ഷിക്കുന്നത്. റെഡ്മി നോട്ട് 13 പ്രോ+ മോഡലിൽ ലെതർ ഫിനിഷ് നൽകാനും സാധ്യതയുണ്ട്. മറ്റ് മോഡലുകൾക്ക് ഗ്ലാസ് ബാക്ക് പാനലായിരിക്കും നൽകുന്നത്. പുതിയ റെഡ്മി നോട്ട് 13 സീരീസ് മാലി-ജി610 ജിപിയുവുമായി ജോടിയാക്കിയ മീഡിയടെക് ഡൈമൻസിറ്റി 7200 അൾട്ര എസ്ഒസിയുടെ കരുത്തിലായിരിക്കും പ്രവർത്തിക്കുന്നത്. റെഡ്‌മി നോട്ട് 13, നോട്ട് 13 പ്രോ വേരിയന്റുകളിൽ വ്യത്യസ്ത ചിപ്‌സെറ്റുകൾ ഉണ്ടായിരിക്കും.

ബാറ്ററിയും ചാർജിങ് സപ്പോർട്ടും

റെഡ്മി നോട്ട് 13 സീരീസ് 6 ജിബി, 8 ജിബി, 12 ജിബി റാം ഓപ്ഷനുകളിലും 128 ജിബി മുതൽ 1 ടിബി വരെയുള്ള സ്റ്റോറേജ് ഓപ്ഷനുകളിലും ലഭ്യമാകുമെന്ന് പ്രതീക്ഷിക്കുന്നു. ആൻഡ്രോയിഡ് 13 ബേസ്ഡ് എംഐയുഐ 13ൽ ആയിരിക്കും ഈ ഡിവൈസുകൾ പ്രവർത്തിക്കുന്നത്. സ്റ്റാൻഡേർഡ് റെഡ്മി നോട്ട് 13, നോട്ട് 13 പ്രോ മോഡലുകൾക്ക് 67W ഫാസ്റ്റ് ചാർജിങ് സപ്പോർട്ടുള്ള 5,120 എംഎഎച്ച് ബാറ്ററി ഉണ്ടായിരിക്കുമെന്ന് സൂചനകളുണ്ട്. റെഡ്മി നോട്ട് 13 പ്രോ+ൽ 5,000mAh ബാറ്ററിയും 120W ഫാസ്റ്റ് ചാർജിങ് സപ്പോർട്ടും ഉണ്ടായിരിക്കും.