Xiaomi 12 Pro | ഷവോമി 12 പ്രോ സ്മാർട്ട്ഫോണിന് 10,000 രൂപ കുറച്ചു, വില കുറയ്ക്കുന്നത് രണ്ടാം തവണ

ജനപ്രിയ സ്മാർട്ട്ഫോൺ നിർമ്മാതാക്കളായ ഷവോമി തങ്ങളുടെ പ്രീമിയം ഫോണിന്റെ വില വീണ്ടും കുറച്ചു. ഷവോമി 12 പ്രോ (Xiaomi 12 Pro) സ്മാർട്ട്ഫോണിന്റെ വിലയാണ് കമ്പനി കുറച്ചിരിക്കുന്നത്. ഈ വർഷം ആദ്യം പുതിയ ഷവോമി 13 പ്രോ ഇന്ത്യയിൽ അവതരിപ്പിച്ചപ്പോൾ 12 പ്രോ സ്മാർട്ട്ഫോണിന് കമ്പനി വില കുറച്ചിരുന്നു. രണ്ട് വിലക്കുറവ് ലഭിച്ചതുകൊണ്ട് ഷവോമി 12 പ്രോ ലോഞ്ച് ചെയ്തതിനെക്കാൾ വളരെ കുറഞ്ഞ വിലയിലാണ് ഇപ്പോൾ ലഭ്യമാകുന്നത്.

രണ്ടാം വിലക്കുറവ്

ഈ വർഷം ഫെബ്രുവരിയിലാണ് ഷവോമി 12 പ്രോ സ്മാർട്ട്ഫോണിന് കമ്പനി 8,000 രൂപ കുറച്ചത്. ഇത്തവണ ഷവോമി 10,000 രൂപയാണ് ഈ ഡിവൈസിന് കുറച്ചിരിക്കുന്നത്. ഇതോടെ മൊത്തം 18000 രൂപയാണ് ഫോണിന് കുറച്ചിരിക്കുന്നത്. രണ്ട് വേരിയന്റുകളിലാണ് ഈ ഡിവൈസ് ഇന്ത്യയിൽ ലഭ്യമാകുന്നത്. 60000 രൂപയ്ക്ക് മുകളിൽ വിലയുമായി വിപണിയിലെത്തിയ ഈ സ്മാർട്ട്ഫോൺ ഇപ്പോൾ 50000 രൂപയിൽ താഴെ വിലയിൽ ലഭ്യമാണ്. ആകർഷകമായ സവിശേഷതകളുള്ള പ്രീമിയം ഫോണാണ് ഷവോമി 12 പ്രോ.

പുതുക്കിയ വില

ഷവോമി 12 പ്രോ സ്മാർട്ട്ഫോണിന്റെ 8 ജിബി റാമും 256 ജിബി സ്റ്റോറേജുമുള്ള വേരിയന്റ് 62,999 രൂപയ്ക്കാണ് ഇന്ത്യയിൽ അവതരിപ്പിച്ചത്. ഫോണിന്റെ 12 ജിബി റാമും 256 ജിബി സ്റ്റോറേജുമുള്ള മോഡലിന് ഇന്ത്യയിൽ 66,999 രൂപയായിരുന്നു വില. ഫെബ്രുവരിയിൽ വില കുറച്ചതോടെ 8 ജിബി റാം വേരിയന്റ് 54,999 രൂപയ്ക്കും 12 ജിബി റാം വേരിയന്റ് 58,999 രൂപയ്ക്കും ലഭ്യമായി തുടങ്ങി. ഇപ്പോൾ 10,000 രൂപ കൂടി കുറച്ചതോടെ 8 ജിബി വേരിയന്റ് 44,999 രൂപയ്ക്കും 12 ജിബി വേരിയന്റ് 48,999 രൂപയ്ക്കും ലഭിക്കും. നോയർ ബ്ലാക്ക്, ഓപ്പറ മൗവ്, കോച്ചർ ബ്ലൂ എന്നീ മൂന്ന് കളർ ഓപ്ഷനുകളിൽ സ്മാർട്ട്‌ഫോൺ ലഭ്യമാണ്.

Xiaomi 12 Pro | ഷവോമി 12 പ്രോയുടെ സവിശേഷതകൾ

ഷവോമി 12 പ്രോ 5ജി സ്മാർട്ട്ഫോണിൽ 6.73 ഇഞ്ച് WQHD + AMOLED ഡിസ്‌പ്ലേയാണുള്ളത്. 120Hz വരെ റിഫ്രഷ് റേറ്റ് സപ്പോർട്ട് ചെയ്യുന്ന ഡിസ്പ്ലെ LTPO 2.0 പാനലാണ്. ഡിസ്പ്ലെയുടെ അഡാപ്റ്റീവ് റിഫ്രഷ് റേറ്റ് 1Hz വരെ കുറയ്ക്കാം. മികച്ച ഗെയിമിങ് എക്സ്പീരിയൻസ് നൽകാനായി ഡിസ്പ്ലെയിൽ 480Hz ടച്ച് സാമ്പിൾ റേറ്റുമുണ്ട്. 12 ജിബി വരെ റാമും 256 ജിബി ഇന്റേണൽ സ്റ്റോറേജുമുള്ള സ്മാർട്ട്ഫോണിന് കരുത്ത് നൽകുന്നത് ക്വാൽകോം സ്‌നാപ്ഡ്രാഗൺ 8 ജെൻ 1 പ്രോസസറാണ്.

120W ഫാസ്റ്റ് ചാർജിങ്

ഷവോമി 12 പ്രോ സ്മാർട്ട്ഫോണിൽ ഡോൾബി അറ്റ്‌മോസ് സപ്പോർട്ടുണ്ട്. ഹർമൻ കാർഡോണിന്റെ ക്വാഡ്-സ്പീക്കർ സെറ്റപ്പുമായി വരുന്ന ഈ ഡിവൈസ് ആൻഡ്രോയിഡ് 12 ബേസ്ഡ് എംഐയുഐ 13ലാണ് പ്രവർത്തിക്കുന്നത്. 120W ഹൈപ്പർചാർജ് സാങ്കേതികവിദ്യ, 50W വയർലെസ് ഫാസ്റ്റ് ചാർജിങ്, 10W റിവേഴ്സ് ചാർജിങ് എന്നിവ സപ്പോർട്ട് ചെയ്യുന്ന 4600mAh ബാറ്ററിയാണ് ഷവോമി 12 പ്രോ സ്മാർട്ട്ഫോണിൽ ഷവോമി നൽകിയിട്ടുള്ളത്. ഈ ബാറ്ററി ബൂസ്റ്റ് മോഡിൽ 18 മിനുറ്റിൽ ചാർജ് ചെയ്യാം.

മൂന്ന് 50 എംപി ക്യാമറകൾ

മൂന്ന് പിൻക്യാമറകളാണ് ഷവോമി 12 പ്രോ സ്മാർട്ട്ഫോണിലുള്ളത്. 50 എംപി സോണി IMX707 വൈഡ് ആംഗിൾ പ്രൈമറി സെൻസർ, 50 എംപി ടെലിഫോട്ടോ ലെൻസ്, 50 എംപി അൾട്രാ വൈഡ് ആംഗിൾ ക്യാമറ എന്നിവയാണ് ഈ ട്രിപ്പിൾ റിയർ ക്യാമറ സെറ്റപ്പിലെ സെൻസറുകൾ. ഫോണിൽ സെൽഫികൾക്കും വീഡിയോ കോളുകൾക്കുമായി 32 എംപി ഫ്രണ്ട് ക്യാമറയും നൽകിയിട്ടുണ്ട്.