ഷവോമിയുടെ റെഡ്മി സീരിസിന്റെ ജനപ്രീതിയെക്കുറിച്ച് പറയേണ്ട കാര്യമില്ലല്ലോ. ഇന്ത്യയിൽ പോക്കറ്റിലെ പൈസ നോക്കി സ്മാർട്ഫോൺ വാങ്ങുന്ന എല്ലാവരുടെയും ഇഷ്ട ബ്രാൻഡാണ് ഇപ്പോൾ ഷവോമി. സാധാരണക്കാരുടെ താല്പര്യങ്ങളും ആവശ്യങ്ങളും മനസിലാക്കി ഫോണുകൾ വിപണിയിലെത്തിക്കുന്ന ഷവോമിയുടെ ഏറ്റവും വില കൂടിയ മോഡലായ റെഡ്മി K20 പ്രോയ്ക്ക് പോലും ബജറ്റ് സെഗ്മെന്റിൽ ഇന്ന് ഇഷ്ടംപോലെ ആരാധകരുണ്ട്.

“സ്മാർട്ട് ദേശ് കാ സ്മാർട്ഫോൺ” എന്ന ടാഗിൽ റെഡ്മി 7 മൂന്ന് മാസങ്ങൾക്ക് മുൻപ് പുറത്തിറക്കുമ്പോൾ പ്രതീക്ഷ വാനോളമായിരുന്നു. എന്നാൽ ഷവോമി ഇതൊന്നും തെറ്റിച്ചില്ല. ഇപ്പോഴിതാ Redmi 8A എന്ന പേരിൽ റെഡ്മി 7-ന് വളരെ കുറഞ്ഞ കാലയളവിൽ തന്നെ അപ്ഡേറ്റ് ഇറക്കിയിരിക്കുകയാണ് കമ്പനി. USB ടൈപ്പ്-C പോർട്ടും 5000 mAh ബാറ്ററിയുമായാണ് റെഡ്മി 8 എ വിപണിയിലെത്തുന്നത്. ഈ പുതിയ ഫീച്ചറുകൾ സ്മാർട്ഫോൺ പ്രേമികളെ ആകർഷിക്കുമോ?

Redmi 8A | ഡിസൈൻ

ആദ്യ കാഴ്ചയിൽത്തന്നെ ഇത്രയും വില കുറഞ്ഞ ഫോണിന് ഇത്രയും മികച്ച ഡിസൈനോ എന്ന് നിങ്ങൾ തന്നെ സ്വയം ചോദിച്ചേക്കാം. അത്ര മികച്ച ഡിസ്‌പ്ലേയാണ് റെഡ്മി 8 എയുടേത്. മഴത്തുള്ളിയുടെ ആകൃതിയിൽ നോച്ചുള്ള 6 .22-ഇഞ്ച് ഡിസ്‌പ്ലേയാണ് റെഡ്മി 8 എയ്ക്കുള്ളത്. റെഡ്മി 7 എയുടെ 5.45-ഇഞ്ച് ഡിസ്പ്ലേയേക്കാളും വലുതാണിത്. ഫോണിന്റെ ഇയർപീസ് ഹാൻഡ്‌സെറ്റിന്റെ ഫ്രയിമിന്റെ അടുത്തേക്ക് മാറ്റിയിട്ടുണ്ട്.

കയ്യിലൊതുങ്ങുന്ന തരത്തിലുള്ള ഡിസൈനാണ് ഷവോമി പുതിയ ഹാൻഡ്‌സെറ്റിന് നൽകിയിരിക്കുന്നത്. വലത് ഭാഗത്തായാണ് വോയിസ് ബട്ടണുകളുള്ളത്. സിം ട്രേ ഇടത് വശത്താണ് കൊടുത്തിരിക്കുന്നത്. മുകളിലായി ഒരു സെക്കൻഡറി മൈക്രോ ഫോണുമുണ്ട്. 7,000 രൂപയ്ക്ക് താഴെ വിലയുള്ള ഫോണുകളിൽ വളരെ അപൂർവമായി മാത്രം കാണുന്ന USB ടൈപ്പ്-C പോർട്ട് ഏറ്റവും താഴെയായി നൽകിയിരിക്കുന്നു. 3.5mm ഹെഡ്‍ഫോൺ ജാക്കും, പ്രൈമറി മൈക്രോഫോണും ലൗഡ്സ്പീക്കറും താഴെയാണുള്ളത്.

Redmi 8A ഫീച്ചറുകൾ

720×1440 പിക്‌സലുള്ള HD+ ഡിസ്പ്ലേയാണ് റെഡ്മി 8 എയ്ക്കുള്ളത്. കോർണിങ് ഗോറില്ല ഗ്ലാസ് 5 ആണ് ഫോണിന് സുരക്ഷ നൽകുന്നത്. റെഡ്മി 7 എയിലേത് പോലെ സ്നാപ്ഡ്രാഗൺ 439 SoC യിലാണ് റെഡ്മി 8 എ പ്രവർത്തിക്കുന്നത്. ഒക്ടാ-കോർ പ്രോസസ്സർ ആണിത്. രണ്ട് പതിപ്പുകളിലായാണ് ഫോൺ ഇറങ്ങുന്നത്. 2 ജിബി റാമും 32 ജിബി സ്റ്റോറേജുമുള്ള മോഡലിന് 6,499 രൂപയാണ് വില. 3 ജിബി റാമും 32 ജിബി സ്റ്റോറേജുമുള്ള മോഡലിന്റെ വില 6,999 രൂപയാണ്. റെഡ്മി 8 എയുടെ ബേസ് വാരിയന്റാണ് ഇവിടെ റിവ്യൂ ചെയ്യുന്നത്.

നാണ് ശ്രമിക്കുന്നത്. റെഡ്മി 6 എ 3,000 MAh ബാറ്ററിയുമായി ഇറങ്ങിയപ്പോൾ റെഡ്മി 8 എയ്ക്ക് നൽകിയിരിക്കുന്നത് കിടിലൻ 5,000 mAh ബാറ്ററിയാണ്. 18W ഫാസ്റ്റ് ചാർജിങ് ഫോൺ സപ്പോർട്ട് ചെയ്യുമെങ്കിലും 10W ചാർജർ മാത്രമേ ഫോണിനൊപ്പം ലഭിക്കുകയുള്ളൂ.

രണ്ട് നാനോ സിം സ്ലോട്ടും മൈക്രോ എസ്ഡി സ്ലോട്ടുമാണ് റെഡ്മി 8 എയിലുള്ളത്. 4 ജി സപ്പോർട്ടും വോൾട്ടും ഫോണിനുണ്ട്. ബ്ലൂടൂത്ത് 4.2, വൈഫൈ 802.11b/g/n, 4 സാറ്റലൈറ്റ് നാവിഗേഷൻ സിസ്റ്റം എന്നിവയാണ് മറ്റ് കണക്ടിവിറ്റി ഓപ്‌ഷനുകൾ. വയർലെസ്സ് എഫ്എം സൗകര്യവും ഫോണിലുണ്ട്. അതായത് ഹെഡ്സെറ്റ് ഫോണിൽ കണക്ട് ചെയ്യാതെ തന്നെ എഫ്എം റേഡിയോ കേൾക്കാം എന്ന്‌ ചുരുക്കം.

സോഫ്റ്റ് വെയർ ഭാഗത്തേക്ക് വരുമ്പോൾ ആൻഡ്രോയ്ഡ് 9 Pie MIUI 10 ലാണ് റെഡ്മി 8 എ പ്രവർത്തിക്കുന്നത്. ആപ്പ് ഡ്രോവർ ഓപ്‌ഷൻ ഫോണിലില്ല അതുകൊണ്ട് തന്നെ ഹോം സ്‌ക്രീനിൽ തന്നെയാണ് ഇല്ല ആപ്പുകളും കാണാൻ കഴിയുക. Mi കമ്മ്യൂണിറ്റി, പേടിഎം, Mi ക്രെഡിറ്റ്, Mi സ്റ്റോർ , ആമസോൺ ഫേസ്ബുക്ക്, WPS ഓഫീസ്, ഡെയിലിഹണ്ട്, ഗാന, ഒപേറാ മിനി തുടങ്ങിയ അപ്പുകളെല്ലാം പ്രീ-ഇൻസ്റ്റാൾ ചെയ്ത ഫോണാണ് നിങ്ങളുടെ കയ്യിലെത്തുന്നത്.

ലുഡോ മാസ്റ്റർ, ബ്ലോക്ക് പസിൽ ഗാർഡിയൻ, പോപ്പ് ഷൂട്ടർ ബ്ലാസ്റ്, ഡസ്ട് സെറ്റിൽ എന്നീ ഗെയിമുകളും ഫോണിൽ ഇൻസ്റ്റാൾ ചെയ്താണ് വരുന്നത്. ഗൂഗിൾ പ്ലേ സ്റ്റോറിന് സമാനമായി ഗെറ്റ്ആപ്പ്സ് (GetApps) എന്ന ആപ്പ് സ്റ്റോറാണ് ഉണ്ടാവുക.

മറ്റ് റെഡ്മി ഫോണുകളിലെ പോലെ സ്പാം നോട്ടിഫിക്കേഷനുകൾക്ക് പുതിയ ഫോണിലും കുറവൊന്നുമില്ല. പുതിയ ആപ്പ് ഇൻസ്റ്റാൾ ചെയ്യുമ്പോഴൊക്കെ പലതരം പരസ്യങ്ങൾ കാണാനാവും. ഡ്യൂവൽ ആപ്പ്സ് എന്ന സംഗതിയും റെഡ്മി 8 എ യിലുണ്ട്. ഗൂഗിളിന്റെ ഫാമിലി ലിങ്ക് ഉപയോഗിച്ച് കുട്ടികൾ ഫോൺ ഉപയോഗിക്കുന്നത് നിയന്ത്രിക്കാനും കഴിയും. പാസ്സ്‌കോഡ് അല്ലെങ്കിൽ മുഖം ഉപയോഗിച്ച് ആപ്പുകൾ ലോക്ക് ചെയ്യാനും ഓപ്പൺ ചെയ്യാനും കഴിയും. ഗെയിം പ്രേമികൾക്ക് വേണ്ടി ഗെയിം സ്പീഡ് ബൂസ്റ്ററും (Game Speed Booster app) ഉണ്ട്.

പെർഫോമൻസ്, ബാറ്ററി ലൈഫ്

ഉപയോഗിക്കുന്നവർക്ക് നല്ല അനുഭവം നൽകുന്ന ഹാർഡ്‌വെയർ ഫീച്ചറുകളാണ് റെഡ്മി 8 എയിലുള്ളത്. ചില ആപ്പുകൾ ലോഡ് ആയി വരാൻ ചിലപ്പോഴൊക്കെ സമയം കൂടുതലെടുക്കുന്നുണ്ട്. ഫേസ് ലോക്ക് ആപ്പ് നല്ല വേഗത്തിൽ പ്രവർത്തിക്കുന്നുണ്ട്.

ഡിസ്‌പ്ലേ പല ആംഗിളുകളിലും നല്ല വ്യൂ തരുന്നുണ്ട്. സ്പീക്കറുകളിൽ നിന്നുള്ള ശബ്ദവും നല്ലതാണ്. ഔട്ട്ഡോറിൽ ഫോണിന്റെ ഡിസ്പ്ലേ കാണാൻ ചെറുതായി കഷ്ടപ്പെടേണ്ടി വരും. ക്വാൽകോം സ്നാപ്ഡ്രാഗൺ 439 SoC പ്രോസെസ്സറിന്റെ പ്രവർത്തനവും തൃപ്തികരമാണ്. തുടർച്ചയായി വാട്സാപ്പിൽ ചാറ്റ് ചെയ്തിട്ടും, ഗൂഗിൾ മാപ് രണ്ട് മണിക്കൂറിലേറെ ഉപയോഗിച്ചിട്ടും ഒരു ദിവസം മുഴുവൻ ഫോൺ ബാറ്ററി ഡ്രൈ ആയില്ലെന്നു മാത്രമല്ല അമ്പത് ശതമാനം ബാക്കിയും കാണിച്ചു.

ഫോണിനൊപ്പം ലഭിക്കുന്ന 10W ചാർജർ ഉപയോഗിക്കുമ്പോൾ 30 മിനുട്ടിൽ 25 ശതമാനം ബാറ്ററി ചാർജ് ചെയ്യാൻ കഴിയുന്നുണ്ട്. ഒരു മണിക്കൂറിൽ ഫോൺ 46 ശതമാനം ചാർജ് ആയി. ഫോൺ മുഴുവനായും ചാർജ് ആവാൻ രണ്ടര മണിക്കൂറാണ് സമയമെടുത്ത്. റെഡ്മി 8 എ 18W ചാർജിങ് സപ്പോർട്ട് ചെയ്യും. ഷവോമി 18W ചാർജർ 449 രൂപ വിലയിലാണ് വിൽക്കുന്നത്. റെഡ്മി 8 എ ഫോൺ വാങ്ങിക്കുന്നവർ ഈ പൈസ ചിലവാക്കി ചാർജർ വാങ്ങിക്കുന്നതിൽ ഒരു തെറ്റുമില്ല.

Redmi 8A ക്യാമറ

സിംഗിൾ ക്യാമറ മാത്രമുള്ള ഫോണാണ് റെഡ്മി 8 എ. സോണി IMX363 സെൻസർ അടിസ്ഥാനമാക്കിയുള്ള ക്യാമറയാണിത്. ഗൂഗിൾ പിക്സൽ, പൊക്കോ F1 എന്നിവയ്‌ക്കൊപ്പം നിൽക്കുന്ന 12-മെഗാപിക്സൽ സെൻസറാണ് റെഡ്മി 8 എയുടേത്. f/1.8 അപ്പാർച്ചർ, a 1.4-മൈക്രോൺ പിക്സൽ സൈസ്, ഡ്യൂവൽ-പിക്സൽ ഓട്ടോ ഫോക്കസ് എന്നിവയാണ് ക്യാമറയുടെ മറ്റ് സവിശേഷതകൾ.Redmi 8 എയുടെ മുന്നിലുള്ളത് 8-മെഗാപിക്സൽ സെൽഫി ക്യാമറയാണ്. f/2.0 അപ്പാർച്ചറും 1.12-മൈക്രോൺ പിക്സലുമാണ് ഈ ക്യാമറ.

പകൽ വെളിച്ചത്തിൽ പെട്ടെന്ന് ഫോക്കസ് ചെയ്യുന്ന ക്യാമറയുടെ സ്പീഡ് പ്രകാശം കുറയുമ്പോൾ കുറയുന്നുണ്ട്. അനുകൂലമായ പ്രകാശത്തിൽ നല്ല ഷോട്ടുകളാണ് റെഡ്മി 8 എ നൽകുന്നത്. സൂം ചെയ്യുമ്പോൾ ഷോട്ടുകളുടെ ക്ലാരിറ്റി നഷ്ടപ്പെടുന്നുണ്ട്. നല്ല പ്രകാശമുള്ളപ്പോൾ HDR ഓട്ടോമാറ്റിക് ആയി പ്രവർത്തിക്കുന്നുണ്ട്. ക്ലോസ്-അപ് ഷോട്ടുകളും കൊള്ളാം. ക്യാമറയിലെ AI വളരെ വേഗം തന്നെ എന്താണ് പകർത്തുന്നതെന്ന് തിരിച്ചറിയുന്നുണ്ട്. ഈ വിലയിലുള്ള ഫോണുകളുടെ ക്യാമറകളുമായി താരതമ്യം ചെയ്യുമ്പോൾ മികച്ച ക്യാമറ തന്നെയാണ് റെഡ്മി 8 എ യുടേത്. പകൽ വെളിച്ചത്തിൽ എടുക്കുന്ന സെൽഫികൾ നല്ലതാണെന്നു മാത്രമല്ല, ബ്യുട്ടിഫിക്കേഷൻ ഫിൽറ്ററുകളും സെൽഫി എടുക്കാൻ ഉപയോഗിക്കാം.

റെഡ്മി 7 വിപണിയിലെത്തി മൂന്നു മാസത്തിനു ശേഷം വന്ന റെഡ്മി 8 എ പഴയ ഫോണിന്റെ അതെ ക്വൽകോം സ്നാപ്ഡ്രാഗൺ 439SoC പ്രൊസസ്സറാണ് ഉപയോഗിക്കുന്നതെങ്കിലും കുറെയധികം ഫീച്ചറുകളിൽ മാറ്റം വരുത്തിയിട്ടുണ്ട്. ഹാർഡ്‌വെയറുകളിലും മെച്ചപ്പെടുത്തലുകൾ കൊണ്ടുവന്നിട്ടുണ്ട്. കൂടുതൽ വലിയ ഡിസ്‌പ്ലേയും മികച്ച ക്യാമറകളുമാണ് റെഡ്മി 8 എ യുടേത്. USB ടൈപ്പ്-C പോർട്ടും 5,000 mAh ബാറ്ററിയും ഷവോമി എടുത്ത മികച്ച തീരുമാനങ്ങളാണെന്ന് പറയാം.

മുൻപ് റെഡ്മി നോട്ട് 7 ന് ശേഷം ഉടൻ തന്നെ റെഡ്മി നോട്ട് 7 എസ് പുറത്തിറക്കിയ ഷവോമി ഇപ്പോൾ റെഡ്മി 8 എയിലൂടെ പഴയ രീതി ആവർത്തിക്കുകയാണ് ചെയ്തിരിക്കുന്നത്. റെഡ്മി 7 എയുടെ ലോഞ്ച് വിലയേക്കാളും വില കൂടുതലാണ് റെഡ്മി 8 എ മോഡലിന്. എന്നിരുന്നാലും ആ വിലക്കൂടുതലിന് അനുസരിച്ചുള്ള ഫീച്ചറുകൾ ഫോണിൽ കാണാൻ കഴിയുന്നുണ്ട്.

7,000 രൂപയിൽ താഴെയുള്ള ഒരു ബജറ്റ് സ്മാർട്ഫോൺ അല്ലെങ്കിൽ വില കുറച്ച് കുറവുള്ള ഒരു സെക്കൻഡറി ഹാൻഡ്‌സെറ്റ് ആണ് നിങ്ങൾക്ക് വേണ്ടതെങ്കിൽ റെഡ്മി 8 എ മികച്ച ഒരു ചോയ്‌സാണ്.