പുത്തൻ സ്മാർട്ട്ഫോണുമായി വീണ്ടും വിവോ; Vivo Y27 സ്മാർട്ട്ഫോൺ ഇന്ത്യയിൽ അവതരിപ്പിച്ചു

ജനപ്രിയ സ്മാർട്ട്ഫോൺ നിർമ്മാതാക്കളായ വിവോ പുതിയൊരു വൈ സീരീസ് സ്മാർട്ട്ഫോൺ കൂടി ഇന്ത്യൻ വിപണിയിൽ അവതരിപ്പിച്ചു. വിവോ വൈ27 (Vivo Y27) എന്ന ഡിവൈസാണ് കമ്പനി ലോഞ്ച് ചെയ്തിരിക്കുന്നത്. കുറഞ്ഞ വിലയിൽ മികച്ച സവിശേഷതകളുമായിട്ടാണ് ഈ ഡിവൈസ് രാജ്യത്ത് ലോഞ്ച് ചെയ്തിരിക്കുന്നത്. 15000 രൂപയിൽ താഴെ വിലയുള്ള വിവോ വൈ27 സ്മാർട്ട്ഫോൺ ഒരു വേരിയന്റിൽ മാത്രമേ ലഭ്യമാവുകയുള്ളു.

Vivo Y27 | വിവോ വൈ27

വിവോ വൈ27 സ്മാർട്ട്ഫോണിൽ ഗ്ലാസ് ബോഡിയാണുള്ളത്. FHD+ ഡിസ്‌പ്ലേയും ഫോണിലുണ്ട്. മീഡിയടെക് ചിപ്‌സെറ്റിൽ പ്രവർത്തിക്കുന്ന ഫോണിൽ 5000 എംഎഎച്ച് ബാറ്ററിയാണ് വിവോ നൽകിയിട്ടുള്ളത്. 50 എംപി പ്രൈമറി ക്യാമറയുള്ള ഡ്യൂവൽ ക്യാമറ സെറ്റപ്പുമായിട്ടാണ് വിവോ വൈ27 വരുന്നത്. 44W ഫാസ്റ്റ് ചാർജിങ് സപ്പോർട്ടും വിവോയുടെ ഈ ഫോണിലുണ്ട്. വിവോ വൈ27 സ്മാർട്ട്ഫോണിന്റെ വിലയും സവിശേഷതകളും വിശദമായി നോക്കാം

വിലയും ലഭ്യതയും

വിവോ വൈ27 സ്മാർട്ട്ഫോണിന്റെ ഒരു വേരിയന്റ് മാത്രമാണ് നിലവിൽ രാജ്യത്ത് ലഭ്യമാകുന്നത്. 6 ജിബി റാമും 128 ജിബി സ്റ്റോറേജുമുള്ള വിവോ വൈ27 സ്മാർട്ട്ഫോണിന് 14,999 രൂപയാണ് വില. രണ്ട് കളർ ഓപ്ഷനുകളിൽ ഫോൺ ലഭ്യമാകും. ബർഗണ്ടി ബ്ലാക്ക്, ഗാർഡൻ ഗ്രീൻ എന്നിവയാണ് ഫോണന്റെ കളർ ഓപ്ഷനുകൾ. ഫ്ലിപ്പ്കാർട്ട്, ആമസോൺ, വിവോ ഇന്ത്യ ഇ-സ്റ്റോർ എന്നിവയിലൂടെ ഓൺലൈനായും രാജ്യത്തെ അംഗീകൃത റീട്ടെയിൽ സ്റ്റോറുകൾ വഴി ഓഫ്‌ലൈനായും വിവോ വൈ27 സ്മാർട്ട്ഫോൺ സ്വന്തമാക്കാം.

ഡിസ്പ്ലെയും പ്രോസസറും

വിവോ വൈ27 സ്മാർട്ട്ഫോണിൽ 6.64 ഇഞ്ച് ഫുൾ എച്ച്ഡി+ ഡിസ്പ്ലേയാണുള്ളത്. 1080×2388 പിക്സൽ റെസല്യൂഷനുള്ള ഈ ഡിസ്‌പ്ലേയ്ക്ക് 90Hz റിഫ്രഷ് റേറ്റുമുണ്ട്. 600 നിറ്റ്സ് വരെ പീക്ക് ബ്രൈറ്റനസും ഈ ഡിസ്പ്ലെയ്ക്ക് ഉണ്ട്. 6 ജിബി റാമുമായി ജോടിയാക്കിയ ഒക്ടാ കോർ മീഡിയടെക് ഹീലിയോ ജി 85 പ്രോസസറാണ് വിവോ വൈ27 ബജറ്റ് സ്മാർട്ട്‌ഫോണിന് കരുത്ത് നൽകുന്നത്. ഉപയോഗിക്കാത്ത സ്റ്റോറേജ് റാമാക്കി മാറ്റുന്ന വെർച്വൽ റാം ഫീച്ചറും വിവോ ഈ ഫോണിൽ നൽകിയിട്ടുണ്ട്. ഇത്തരത്തിൽ റാം 6 ജിബി കൂടി വർധിപ്പിക്കാൻ സാധിക്കും.

ക്യാമറയും ഒഎസും

രണ്ട് പിൻ ക്യാമറകളുമായിട്ടാണ് വിവോ വൈ27 സ്മാർട്ട്ഫോൺ പുറത്തിറങ്ങിയിരിക്കുന്നത്. എഫ്/1.8 അപ്പേർച്ചർ ലെൻസുള്ള 50 എംപി സെൻസറാണ് ഫോണിലെ പ്രൈമറി ക്യാമറ. ഇതിനൊപ്പം എഫ്/2.4 അപ്പേർച്ചറുള്ള 2 എംപി ഡെപ്‌ത് ക്യാമറയും ഡ്യൂവൽ ക്യാമറ സെറ്റപ്പിൽ വിവോ നൽകിയിട്ടുണ്ട്. സെൽഫികൾക്കും വീഡിയോ കോളുകൾക്കുമായി വിവോ വൈ27 ഫോണിൽ 8 എംപി ഫ്രണ്ട് ക്യാമറയാണുള്ളത്. ആൻഡ്രോയിഡ് 13ബേസ്ഡ് ഫൺടച്ച് ഒഎസ് 13ലാണ് ഈ ഡിവൈസ് പ്രവർത്തിക്കുന്നത്.

സ്റ്റോറേജും ബാറ്ററിയും

വിവോ വൈ27 സ്മാർട്ട്ഫോണിൽ 128 ജിബി ഇന്റേണൽ സ്റ്റോറേജാണുള്ളത്. ഈ സ്റ്റോറേജ് തികയാത്ത ആളുകൾക്ക് മൈക്രോ എസ്ഡി കാർഡ് വഴി സ്റ്റോറേജ് എക്സ്പാൻഡ് ചെയ്യാനുള്ള സംവിധാനവും വിവോ നൽകുന്നുണ്ട്. വിവോ വൈ27 സ്മാർട്ട്ഫോൺ സൈഡ് മൗണ്ടഡ് ഫിംഗർപ്രിന്റ് സെൻസറുമായിട്ടാണ് വരുന്നത്. 44W ഫാസ്റ്റ് ചാർജിങ് സപ്പോർട്ടുള്ള 5000 mAh ബാറ്ററിയും ഈ സ്മാർട്ട്ഫോണിലുണ്ട്. ബജറ്റ് സെഗ്മെന്റിലെ ഫോണുകളിൽ കാണുന്ന എല്ലാ കണക്റ്റിവിറ്റി ഓപ്ഷനുകളും വിവോ വൈ27 സ്മാർട്ട്ഫോണിലും ഉണ്ട്.